واحد من اهدافي 

يمكن هالبوست ماراح يكون طويل لان بحاول اختصر كلامي و شكرا

——–

وايد بنات و خاصه المراهقات يحاولون و يسون اللي يقدرون عليه عشان يصيرون مثل فلانه و غيرها من الناس المشهورين و ينسون نفسهم

اول كنت اقول انا بس وحده شلون لو بقدر اغير تفكير الناس او احاول اوصل فكره حق اكبر عدد ممكن؟ بس اكتشفت ان مو وايد صعب هالشي اذا عارف شنو بتقول و شلون تقوله

واحد من اهدافي ان هالبنات اللي يفكرون يصيرون نفس هذه و هذيج، يحاولون يشيلون الفكره من بالهم. و بدال هالطاقه اللي يشوفون فيهم هذول اللي اغلبيتهم يدعون المثاليه، يحاولون يطورون من نفسهم و يكونون لهم شخصيتهم لان وايد صار اب مجتمعنا فيه كوبي بيست و استنساخ مو طبيعي ان كان من طريقه اللبس/ الكلام/ او الشكل

حتى شخصيه ماكو.. في مره وحده شرت شغله سألتها انتي تحبين جذي اشياء قالتلي والله لا بس عشان فلانه عندها انا شريته

حلو ان تكون البنت قنوعه و مقتنعه بذوقها و شخصيتها. و لو بتشوف غيرها يكون للالهام فقط و انا مو قاعده اتكلم عن كل البنات بس في وايد منهم ما عندهم ثقه بنفسهم و اقول هالكلام لان انا كنت وحده وااايد استحي و حتى استحي اتكلم و هذا الشي اللي خلاني اتجه الى الكتابه لان ما كنت اتكلم حتى اذا مو فاهمه ما اقول

و الحين الناس تتضايق من كثر ما اتكلم و احب تكون وجهه نظري واضحه و اذا ما فهمت اخلي الشخص اللي جدامي يعيد مره و مرتين و ثلاث

اذا اشتغلتي على نفسج و انشغلتي بنفسج ما يكون عندج وقت تشوفين غيرج. سالفه الغيره و الحسد اللي صايره على اقل شي “خياليه” صدقوني كل اللي غيركم يسويه تقدرون تسوونه و هذا الشي اثبته حق نفسي و وصلتللي ابيه و اكثر بس اهم شي بكل شي تسوونه ان تخلون بصمتكم فيه

حلو ان تكونين غير و عشان تكونين غير لازم تكونين على طبيعتج. لان اذا بتقلدين غيرج يعتبر تصنع و لان كل شخص غير عن الثاني ف طبيعتج اهي اللي تميزج.

اتمنى اني وصلت الفكره. و اتمنى انكم صج تفكرون ان والله العظيم ماكو احسن من انكم تكونون نفسكم و خلو هالشي فبالكم مو لازم الكل ينعجب فيكم لان انتو مو الكل يعجبكم
تصبحون على خير

___________

Xo Ms Poet