صباح الحُب و مساء الحُب أيضاً ..
وصلت الدوام بدري اليوم و رتبت اشياء مشاعرياً بعد لخبطة طويلة و ممتدة من بداية شهر اكتوبر لاحظت نفسي هالفترة نشاطي قليل أميل لمشاركة تصوير يومياتي افتقدت الكتابة اللي اعتبرها وقود حياتي بلا منازع ، اللي صار بعد مارتبت كذا أمر كان بالمحيط بدون حل .. قررت اسمع بودكاست صمود و الموضوع كان جداً حماسي و حمدت ربي ان سمعته اليوم مو في اي يوم قبل.. المهم وانا اسمع جا لي خاطر ان اتكلم عن ٧ امور علمتني الحياة و حابة اشارككم فيها ..
رقم واحد : ( مافيه ضمانات غير نفسك ) احب هالفكرة و بالنسبه ماشوفها تشاؤمية ابداً لكنها واقعيه جداً و راح تحفزك انك تشتغل على نفسك بدون قلق لانك مشروع الوحيد اللي تقدر تضمن ربحه .
رقم اثنين : تحمل مسؤولية قراراتك و حياتك بشكل عام بس لما نفهم هالدرس راح ينعكس على جوانب كثير في حياتك و من خلالها تقدر تكون الشخص اللي تطمح انك تكونه .
رقم ثلاثة : حب نفسك مثل ماهي بمزاياها بعيوبها بكل مافيها
رقم اربعه : طور نفسك دائماً تعلم مهارات جديدة اقرا كتاب في تخصص ماتقرا عنه غالباً تعلم كيف تشغل حيز و تستخدم جميع الخيرات اللي بروحك رقم خمسه: العلاقات واللي يعرفني يعرف قداديس انا احب العلاقات لان بالنسبة لي اشوفها انعكاس على تطورك و من خلالها تقدر تعرف هل انت في المسار الصحيح او لا لذلك راح يكون في علاقات تتعلم دروس منها و بمجرد مايوصلك الدرس راح تنتهي العلاقة و على النقيض تماماً في علاقات راح تخليك افضل نسخه من روحك و تحمسك على الحياة و التقدم و التطور.
رقم سته : اصنع حياة تشبهك بكل التفاصيل اللي تقدر عليها بدون ماتضغط على نفسك
رقم سبعة : كل مشكلة انت تمر فيها أنت قادرعلى تجاوزها و دائماً استحضر قوله تعالى 😦 لايكلف الله نفساً إلا وسعها ).. مدري ليه وقفت على رقم سبعه بعدها مخي وقف ماقدرت ازيد على القائمة .. جداً بكون ممنونة لو بس نقطة وحدة خلت شعوركم ينبهر منها ، كتبت هالموضوع من قلبي لقلبكم ماعدلت عليه ولا كتبته بنوت طلع من الروح على طول .. كونوا بخير اهتمو باانفسكم و عيشوا حياتكم بالطريقة اللي تسركم .. شيخة 💛✨
A Coffee Shot 