مشوار طويل

باختصار،

تخرجت من الثانويه بمعدل ٢.٢٢ مقررات-أدبي و دشيت كلية بوكسهل تخصص

Banking and Finance

اول ما تخرجت قلت بكمل بس ما لقيت مكان اكمل فيه، و ابوي ماكان راضي اسافر اكمل بره.

ف قدمت على الجامعه الامريكية و درست فيها كورس. للامانه ما ارتحت وايد بالمكان ولا الدراسه كانت صالحتلي ف بديت ادور على مكان ثاني.

و لقيت الكليه الاستراليه تقبلني بس بشرط اغير التخصص و اعيد من اول

و وافقت. و للعلم انا كنت طالبه غير مجتهده من ايام بوكسهل بس عشان اخذ البعثه مره ثانيه لازم ايب معدل فوق ال٣

و نسيت كل شي بالدنيا و قعدت ادرس لدرجه بدو ينادوني “اخت مصطفى” ههه! صج والله

تخرجت مع دبلوم اداره اعمال بمعدل ٣.٤٣

و الحين باقيلي ٧ مواد عشان استلم البكلريوس

و اللي يسألني متى بتتخرجين راح ابجي 😂

لو مو اللويه اللي صارت يمكن الحين دكتوراه بس يلا كل شي خيره

بس والله العظيم مع الوقت اكتشفت كل ما اشتغلت و كنت مشغوله اكثر كل ما الوناسه صار لها معنى غير. لو كل يوم اطلع و اروح و استانس ما احس فيها. و عرفت ان ماكو شي اسمه طريج سهل للنجاح اذا انت ما اشتغلت على نفسك حق نفسك محد راح يحترمك و يقدرك. و الحمدالله على المطبات اللي صارت و قاعده تصير بحياتي الا اني متأكده ان الله كاتبلي شي زين لان نيتي صافيه و اسوي كل شي بحسن نيه. و مادري شلون اشرح اكثر بس لو شنو يصير بحياتكم مو معناته النهايه. اذا تسكر الباب اكيد في باب ثاني، و اذا مافي باب في دريشه.

• انا اؤمن ان ماكو شي مستحيل. و اذا حطيت شي براسك راح توصله•

وشكرا

Ox Ms Poet